大家心目中的笋盘，后来变成最佳老公、暖爸的陈豪，原来都有荒唐时，模特儿出身的陈豪，恃住自己生得高大有型靓仔又揾到钱，晚晚同班模特儿朋友喜爱夜蒲，真系估你唔到。
文：东方新地
夜场冇收获 陈豪：讲就无敌，做就无力
最近陈豪同黎耀祥接受由伍咏薇、林盛斌主持的邵氏兄弟出品之访谈节目《Tiger’s Talk》时，陈豪直认曾是蒲精一名，佢自爆拍摄电影《晚九朝五》的年代，一星期蒲足五晚，不过有一日突然醒觉，陈豪话：“当时感觉就好似一盏射灯照住你，突然醒觉咁样好浪费时间，系时候为人生做返啲嘢，于是就180度转变，自此之后冇再踏足夜场，好努力为人生拼搏。”伍咏薇追问系咪大把女埋身？陈豪笑笑口话：“谂系咁谂，但真实系永远都空手而回，讲就无敌，做就无力。我系唔会饮到烂醉慨人，主要落去跳吓舞，自己沟唔到女咪睇人沟女。我相信每个人成长都需要花段时间去认识自己，后来先知其实自己根本唔锺意呢啲生活，只系想陪朋友，嗰时啲朋友想去就陪埋一齐去。”
呃住父母一年冇工开
被喻为无线金蛋的陈豪，演艺路看来相当顺畅，当模特儿时收入丰厚，又做过电影主角，不过陈豪话都有兜茂时：“我虽然冇祥仔捱得咁耐，但当我有心做演员时，电影圈又唔太吃香，开始冇嘢捞，试过一年都冇工开，完全冇收入，唯有卡数冚卡数，差不多有成十万卡数，但我唔会问屋企人拎钱。”后生时玩够蒲过，先有今日爱家庭爱老婆的陈豪。
祥仔爆万岁最阔绰系靓靓Dicky
伍咏薇称自己拍档过的演员中，以罗家良最阔绰，经常开工万岁，而祥仔说：“有位女演员唔系成日拍，久唔久先返嚟拍剧，有一日外景放午饭，平时正路求其一间酒楼就算，点知佢就揾附近一间名牌酒楼，补几千蚊出嚟食，完全冇诈型，冇睇价钱好豪爽，（咁大方梗系开佢名啦！）咪就系袁咏仪啰！当年张卫健喺清水湾电视城最兴放低几千蚊喺度，直接扣数唔使次次畀钱埋单，好有型！”
提到《杀手》入面，黎耀祥饰演杀手阎武一角，他直言在从影而来武打戏最多的一次，而且拳拳到肉，在台湾庙宇的一场戏更不慎伤腰，他说：“本身系想用威也，不过嗰度做唔到，我要踩上武师只脚再起脚踢，点知佢顶唔住我只手，两个一齐跌落地，我垫底，我本身都惊一惊，尾龙骨一伤就好大镬，好彩又起到身，于是继续拍摄。”
延伸阅读：
陈冠希、余文乐昔日死敌今一同变大叔！吴彦祖发线再上移变甩毛男神
【杀手】第16-20集剧透：李佳芯否认恋上陈豪、黎耀祥Man爆带江美仪散心
本文来自东方新地系本站编辑转载，文章版权归原作者所有，内容为作者个人观点，转载目的在于传递更多信息，并不代表本站赞同其观点和对其真实性负责。如涉及作品内容、版权和其它问题，请与本站联系，本站将在第一时间删除内容！